Mat 4 | SwhKC | STEP | Kisha Isa akaongozwa na Roho Mtakatifu kwenda nyikani ili akajaribiwe na ibilisi.

Matthew 4

Kujaribiwa Kwa Isa

(Marko 1:12-13; Luka 4:1-13)

1 ^aKisha Isa akaongozwa na Roho Mtakatifu kwenda nyikani ili akajaribiwe na ibilisi. 2 ^bBaada ya kufunga siku arobaini usiku na mchana, hatimaye akaona njaa. 3 ^cMjaribu akamjia na kumwambia, “Ikiwa wewe ndiye Mwana wa Mungu, amuru mawe haya yawe mikate.”

4 ^dLakini Isa akajibu, “Imeandikwa: ‘Mtu haishi kwa mkate tu, ila kwa kila neno litokalo katika kinywa cha Mungu.’ ”

5 ^eNdipo ibilisi akamchukua Isa mpaka mji mtakatifu na kumweka juu ya mnara mrefu wa Hekalu, 6 ^fakamwambia, “Kama wewe ndiwe Mwana wa Mungu jitupe chini. Kwa kuwa imeandikwa: “ ‘Atakuagizia malaika zake,
nao watakuchukua mikononi mwao
ili usije ukajikwaa mguu wako katika jiwe.’ ”

7 ^gIsa akamjibu, “Pia imeandikwa: ‘Usimjaribu Bwana Mwenyezi Mungu wako.’ ”

8 Kwa mara nyingine, ibilisi akamchukua Isa mpaka kwenye kilele cha mlima mrefu na kumwonyesha falme zote za dunia na fahari zake, 9 kisha akamwambia, “Nitakupa hivi vyote kama ukinisujudia na kuniabudu.”

10 ^hIsa akamwambia, “Ondoka mbele yangu, Shetani! Kwa maana imeandikwa, ‘Mwabudu Bwana Mwenyezi Mungu wako, na umtumikie yeye peke yake.’ ”

11 ⁱNdipo ibilisi akamwacha, nao malaika wakaja na kumhudumia.

Isa Aanza Kuhubiri

(Marko 1:14-15; Luka 4:14-15)

12 ^jIsa aliposikia kwamba Yahya Mbatizaji alikuwa ametiwa gerezani, alirudi Galilaya. 13 ^kAkaondoka Nasiri akaenda kuishi Kapernaumu, mji ulioko karibu na bahari, katika mipaka ya nchi ya Zabuloni na Naftali, 14 ^lili kutimiza unabii wa nabii Isaya, kama alivyosema:
15 ^m“Nchi ya Zabuloni na nchi ya Naftali,
kwenye njia ya kuelekea baharini,
ng’ambo ya Yordani,
Galilaya ya watu wa Mataifa:

16 ⁿwatu wale waliokaa gizani
wameona nuru kuu;
nao wale walioishi katika nchi ya uvuli wa mauti,
nuru imewazukia.”

17 ^oTangu wakati huo, Isa alianza kuhubiri akisema: “Tubuni, kwa maana Ufalme wa Mbinguni umekaribia.”

Isa Awaita Wanafunzi Wake Wa Kwanza

(Marko 1:16-20; Luka 5:1-11)

18 ^pIsa alipokuwa anatembea kando ya Bahari ya Galilaya, aliwaona ndugu wawili, Simoni aitwaye Petro, na Andrea ndugu yake. Walikuwa wakizitupa nyavu zao baharini kwa kuwa wao walikuwa wavuvi. 19 ^qIsa akawaambia, “Njooni, nifuateni nami nitawafanya mwe wavuvi wa watu.” 20 ^rMara wakaziacha nyavu zao, wakamfuata.

21 ^sAlipoendelea mbele kutoka pale, akawaona ndugu wengine wawili, Yakobo mwana wa Zebedayo na Yohana nduguye, wakiwa wamekaa kwenye mashua pamoja na baba yao Zebedayo, wakizitengeneza nyavu zao. Isa akawaita. 22 ^tNao mara wakaiacha mashua yao, pamoja na baba yao, wakamfuata.

Isa Ahubiri Na Kuponya Wagonjwa

(Luka 6:17-19)

23 ^uIsa akapita katika Galilaya yote, akifundisha katika masinagogi yao, akihubiri habari njema za Ufalme, na akiponya kila ugonjwa na kila aina ya maradhi miongoni mwa watu. 24 ^vKwa hiyo sifa zake zikaenea sehemu zote za Shamu, nao watu wakamletea wote waliokuwa na magonjwa mbalimbali na maumivu, waliopagawa na pepo wachafu, wenye kifafa na waliopooza, naye akawaponya. 25 ^wMakutano makubwa ya watu yakawa yanamjia kutoka Galilaya, Dekapoli, ^{▼▼ Yaani Miji Kumi.} Yerusalemu, Uyahudi na kutoka ng’ambo ya Mto Yordani.